Ċentri għall-Iskart Goff

Lokalitajiet

Ħinijiet tal-Ftuħ

Iċ-Ċentri għall-Iskart Goff jiftħu mit-Tnejn sal-Ħadd, inkluż Festi Pubbliċi (barra l-Milied u l-Ewwel tas-Sena) bejn is-7.30a.m. u l-5.30p.m.

Qabel iżżur iċ-Ċentri

L-iskart kollu li jittieħed fiċ-Ċentri għall-Iskart Goff tagħna għandu jiġi sseparat u magħżul minn qabel, biex niżguraw li kemm jista’ jkun skart jiġi użat mill-ġdid jew irriċiklat.

Dħul fiċ-Ċentri għall-iskart Goff huwa permess biss b’vettura.

Residenti li għandhom biss vettura waħda li taqa’ taħt Kategorija A jew B ikollhom aċċess sa 18-il darba f’sena kalendarja ladarba jiġi ppruvat li din hija l-unika vettura li għandhom.

Tista’ tapplika onlajn għal permess billi tagħfas hawnhekk. Tista’ tapplika ukoll għal permess direttament miċ-Ċentri għall-Iskart Goff jew billi ċċempel fuq freephone 8007 2200. Vetturi mingħajr permess ma jingħatawx aċċess.

Tfal jistgħu jidħlu sakemm ikunu akkumpanjati minn adult.

Ikkunsidra li tilbes żarbun b’saħħtu, ħwejjeġ adattati u ingwanti fejn hemm bżonn.

Organizzazzjonijiet mhux governattivi li jixtiequ jagħmlu użu minn dawn iċ-Ċentri huma ġentilment mitluba biex jibagħtulna imejl fuq casoperations@wsm.com.mt.

Vetturi rreġistrati l-Pitkalija għandhom aċċess bla limitu għaċ-Ċentru ġewwa Ta’ Qali biex ikunu jistgħu jarmu l-iskart relatat mas-sengħa tagħhom.

Jekk għandek bżonn gwida jew assistenza waqt iż-żjara tiegħek, jekk jogħġbok kellem lill-impjegati taċ-Ċentru għall-Iskart Goff.

Tista’ tagħmel ukoll użu mis-servizz ta’ ġbir ta’ skart goff offrut b’xejn lir-residenti mill-Kunsilli Lokali rispettivi. Għal aktar informazzjoni fuq dan is-servizz, agħżel il-lokalità tiegħek mill-lista t’hawn taħt.

L-iskart tiegħek

Dawn is-siti jaċċettaw biss skart domestiku.

X’naċċettaw

Skart Goff

Għamara, saqqijiet u twapet
White goods bħal fridges, cookers u microwave ovens
Għamara tal-ġnien
Injam u Metall

Ħwejjeġ u Tessuti

Twapet imqattgħin jew imtebbgħin
Tessuti imqattgħin jew imtebbgħin bħal ħwejjeġ, lożor, purtieri u xugamani

Skart tal-Kostruzzjoni

Skart inert: konkrit, briks, żrar, ramel, siment
Madum, granit u gress
Oġġetti sanitarji taċ-ċeramika (bħal sink u tojlit)
Terrapien

Skart Perikoluż

Mediċina skaduta u siringi użati
Solventi u kimiki
Żebgħa
Batteriji żgħar, batteriji tal-aċidu taċ-ċomb użati fil-karozzi, bozoz u tubi tan-neon

Skart Elettroniku

Kompjuters, monitors, laptops u printers
Mobiles u tablets
Televiżjonijiet, sistemi ta’ navigazzjoni, ġugarelli elettroniċi u għodda (jekk jogħġobkom kunu ċerti li l-informazzjoni personali tagħkom titneħħa minn oġġetti bħal kompjuters, laptops, televiżjonijiet, mowbajls, tablets u sistemi ta’ navigazzjoni)

Skart tal-Ġonna

Ħaxix u friegħi
Zkuk u biċċiet ta’ siġar
Fjuri u weraq
Ħaxix ħażin

Skart Ieħor

Tajers tal-vetturi
Tessuti
Żjut tal-ikel u żejt tal-magni

Infakkrukom li prodotti elettroniċi jistgħu jinġabru wkoll mis-settur kummerċjali li joperaw huma stess sistemi ta’ rkuprar ta’ dan it-tip ta’ skart.

Negozji żgħar

Negozji żgħar issa jistgħu jagħmlu użu miċ-Ċentri għall-Iskart Goff għal ċerti tipi ta’ skart. Skopri aktar hawnhekk.

Skart Goff

Għal aktar informazzjoni dwar is-servizz ta’ ġbir ta’ skart goff offrut mill-Kunsill Lokali tiegħek, jekk jogħġbok agħżel il-lokalità tiegħek mil-lista ta’ hawn taħt.

X’jiġri minnu dan l-iskart?

L-iskart kollu li jittieħed fiċ-Ċentri għall-Iskart Goff jiġi esportat għat-trattament, trattat lokalment, jerġa’ jiġi użat għal fini oħra jew jiġi rriċiklat. L-iskop primarju ta’ dawn iċ-Ċentri huwa li l-iskart jiġi miġbur bl-aħjar mod sabiex minnu jkun jista’ jinġabar materjal sekondarju.

POLITIKA TA’ KWALITÀ U AMBJENTALI

Biex tkun konformi mal-istrateġija tal-ambjent sostenibbli u l-immaniġġjar tal-iskart ta’ Malta, WasteServ qed tfittex li tipprovdi servizz nazzjonali permezz tal-proċess ta’ rkupru u trattament tal-iskart fiċ-Ċentri għall-Iskart Goff (CAS) f’Malta u Għawdex. Is-CAS twaqqfu biex jaċċettaw skart domestiku sseparat. L-iskart separat li jirriżulta jmur għal iżjed proċessar, irkupru, riċiklaġġ jew rimi f’faċilitajiet awtorizzati. Barra minn hekk, permezz tal-operat tar-Reuse Centres (li jinsabu fis-CAS), il-materjal jiġi rkuprat u rrindirizzat għall-użu mill-ġdid.

L-għanijiet ta’ WasteServ huma li tipprovdi servizz affidabbli ta’ ġestjoni tal-iskart, tipprevjeni t-tniġġis, tipproteġi l-ambjent, u tippromwovi ekonomija ċirkolari. Dawn l-għanijiet jiġu mħaddma f’ambjent tax-xogħol sigur, flimkien ma’ impenn li teċċedi l-aspettattivi tal-klijenti.

Permezz tal-ħidma fiċ-Ċentri għall-Iskart Goff u l-fergħat oħra li jappoġġjaw dan, WasteServ tħabrek biex:

Tkun konformi mal-Permessi Ambjentali applikabbli EP00343/25, EP00344/25, EP00345/25, EP00346/25, EP00347/25, EP00348/25, il-leġiżlazzjoni relevanti u r-rekwiżiti applikabbli,
Ittejjeb is-servizz offrut lill-klijenti,
Ittejjeb l-immaniġġjar tal-iskart fuq il-post,
Tipprevjeni/Tnaqqas l-iskart milli jmur fil-miżbla,
Iżżid l-għarfien u l-partiċipazzjoni miil-pubbliku fir-Reuse Centres
Tagħmel użu tajjeb mill-kompost prodott mill-iskart organiku agrikolu,
Tittrasporta u tipproċessa materjal b’mod iżjed effiċjenti,
Ittejjeb it-tħejjija għal emerġenza fis-CAS.

Dawn l-għanijiet huma reveduti kull tliet xhur u l-progress tagħhom huwa diskuss fil-laqgħat mal-Maniġment. Bil-għan li nimplimentaw din il-politika aħna adottajna sistema ta’ immaniġjar ibbażata fuq ir-rekwiżiti ta' ISO 9001:2015 u ISO 14001:2015

Aħna impenjati li ntejbu kontinwament is-sistema tal-immaniġjar tagħna u l-effiċjenza tagħha b’mod kostanti u ripetut. Din il-politika għandha tkun ikkomunikata lil, u mifhuma mill-impjegati kollha fl-organizzazzjoni. Aħna ser inkunu qed nikkomunikaw din il-politika mal-pubbliku, mal-viżitaturi u mal-kuntratturi fiċ-ċentri.

Din il-politika tiġi rriveduta fuq bażi annwali sabiex jiġi żgurat li l-enfasi fuq il-ħtiġijiet tal-klijent, il-preservazzjoni tal-ambjent u l-prevenzjoni ta’ korrimenti u mard relatati max-xogħol jinżamm, u biex il-miżuri tal-wegħda tagħna lill-klijenti jinkisbu.

It-trasportaturi tal-iskart reġistrati jistgħu jaċċessaw ir-regoli taċ-Ċentri għall-Iskart Goff hawn.

Last updated on 13/03/2026